Ikhuza ibuya namhlanje imidlalo yeDStv Premiership ngemuva kwekhefu elidalwe yiFIFA World Cup eqale ngoNovember 20 yaze yaphothulwa ngoDecember 18 inqotshwa yi-Argentina.
Kuphelile manje ukuphikisana ngabadlali bamazwe esingakaze siwavakashele, kubuya uphuthu lwethu esiluthandayo.
Akuvamile ukuthi kube nemidlalo yePSL ngomhlaka 30 no-31 December, kulokhu zishintshile izinto ngenxa yeWorld Cup, futhi kungase kube nomthelela omuhle njengoba libukeka likhulile isasasa ngemidlalo yeDStv Premiership kule sizini.
Namuhla sizozitika ngomdlalo we-Mamelodi Sundowns ne-Orlando Pirates abazobe bengqubuzana okwesine kule sizini. Zombili sezixebulene njengoba iPirates yashaya iSundowns ngo 3-0 emlenzeni wesibili weMTN8 semi-final, iDowns yabuyisa izinduku kwiBlack Label Cup ibhaxabula Ezimnyama ngo 4-0.
ISundowns izoya kulo mdlalo iqhwakele kwi-log yeDStv Premiership, ishiya iPirates, ekunombolo 5, ngamaphuzu awu-9.
Komunye umdlalo okulindeleke ukuthi ushube namhlanje; kuzotholana phezulu iCape Town City neRoyal AM. Omabili lawa maqembu angaphansi kwe-top 8 njengamanje, azobefuna amaphuzu aphelele ukuze angene ’emhlabeni ongcwele’. Silindele nokubona umgadli omusha weCitizens olandwe ngemali eshisayo eColombia, uJuan Zapata.
ISuperSport United, eye ekhefini ivutha ingabaselwe, izobhekana neMarumo Gallants esazama ukuziqhelelanisa nezembe.
Eminye imidlalo yeDStv Premiership namuhla:
Stellenbosch 🆚 Chippa United (17:30)
Maritzburg United 🆚 TS Galaxy (19:30)
Kusasa:
Richards Bay 🆚 Swallows (15:30)
Golden Arrows 🆚 Kaizer Chiefs (15:30)
Sekhukhune 🆚 AmaZulu (17:30)