Umsakazo waseKZN iVuma FM uzidonsele amanzi ngomsele kuvela izindaba zokuthi usuxoshe umsakazi uJacinta Ngobese-Zuma ngaphandle kwezizathu.
UMaNgobese ushicilele isitatimende izolo eveza ukuthi usexoshiwe kulo msakazo, nokuthi usuku lwakhe lokugcina kuzobawu-31 July 2025.
“NgoLwesibili ngo-15 July ngithole incwadi kumqashi wami engazisa ukuthi sengixoshiwe emsebenzini, ngaphandle kwezizathu,” kusho uJacinta esitatimendeni.
“Ngigcine ngitholile ukuthi kunesikhalo esifakiwe ngami, ngeke ngingene ngigamanxe ngokuthi sithini leso sikhalo okwamanje.”
“Ngiyabonga kakhulu ngethuba engilinikezwe yiVuma FM eminyakeni emihlanu edlule. Ngiyabonga nakubalaleli abebengangilaleli nje kuphela kodwa abaphenduke umndeni nabangani…”
Lo msakazi uqhube wabhalela abalandeli beMarch and March Movement, okuyinhlangano elwa nabokufika abakuleli ngokungemthetho, wathi bengavumi lento ibaqede amandla, kunalokho akubaqinise isibindi.
Ezinkundleni zokuxhumana iVuma FM izalelwe yinja endlini njengoba abantu bezwakalisa ukungenami ngesinqumo esithathe ngoJacinta. Abaningi sebeyekile ukulandela ikhasi layo kuFacebook, njengoba lehle ku-225,000 followers, laya ku-215,000 followers. Isivale nama-comments kuFacebook ngenxa yezikhalazo, ezinye zazo ezihamba nenhlamba.