IMamelodi Sundowns izobhekana neqembu eliphekwa wuRulani Mokwena iMC Alger, neqembu elikhiphe i-Orlando Pirates iSt-Eloi Lupopo esigabeni samaqoqo kwiCAF Champions League.
IDowns eshaywe kowamanqamu ngesizini edlule ithole namhlanje ukuthi izobhekana neMC Alger, Lupop ngokunjalo ne-Al Hilal SC kulo mqhudelwano.
Kuzokhumbuleka ukuthi iMC Alger, esiphekwa wuMokwena, yatholana phezulu ne-Orlando Pirates ngesizini edlule kuma quarterfinal.
ISundowns izophinde izwane amandla neqembu elisematheni kulezi nsuku iLupopo, eginqe iTP Mazembe ngo 2-1 ngempelasonto edlule njengoba liqhubeka nokuzakhela igama eDRC.
I-Al Hilal yaseSudan ingelinye lamaqembu avame ukuba yinkinga kwiCAF Champions League. Kuzokhumbuleka ukuthi ngesizini edlile nayo ifinyelele kuma quarterfinal, yakhishwa yi-Al Ahly. Ngesizini ka-2022/2023 iSundowns ne-Al Hilal baqhathwa kuGroup B, badlala ngokulingana kowodwa, omunye iSundowns yanqoba ngo 4-2 ePretoria.
Umdlalo ozobe ubhekwe ngabomvu nokho ngoweSundowns neMC Alger ephekwa wuRulani. IMC Alger iyiqale ngonyawo oluhle le sizini njengoba isinqobe imidlalo emihlanu kweyisithupha, yadlala ngokulingana komunye, okwamanje ayikayizwa induku.
Ngalo mdlalo uRulani uzothola ithuba lokukhombisa iSundowns, eqeqeshwa wuMiguel Cardoso, ukuthi yenza iphutha imxosha.