Mhleli: Ngicela ungivumele ngincome ezami Ezimnyama ngabadlali abahle ebakhiqizile eminyakeni edlule asebemele iBafana Bafana.
Esikwatini sakamuva kubizwe abadlali abahlanu esikwatini seBafana esizodlala imidlalo emibili yobungani. Kulabo badlali kukhona uNkosinathi Sibisi, Innocent Maela, Moh Saleng, Thabiso Monyane noZakhele Lepasa ovutha engabaselwe phambi kwepali muva nje.
Ngaphandle kwalabo badlali kukhona noLyle Foster okhiqizwe eMayfair. Bengingathanda ukubona uNdabayithethwa Ndlondlo esikwatini, ngicabanga ukuthi engabadalela inkinga abadlali bakwamanye amazwe abangamazi.
Isikhathi esiningi amaqembu akuleli awashayelwa ihlombe uma enza kahle, abantu bajaha ukugxeka noma ukunaka izindaba ezingathi shu njengokuthi elinye iqembu ababizwanga abadlali balo, ngeke ngilisho ngoba kuzothiwa sengithe. NeSundowns kufanele inconywe ngokukwazi ukuphakela iBafana ngabadlali ebadingayo. Nenkulisa yayo, iSuperSport United kufanele ishayelwe elikhulu ihlombe ngoba abanye abadlali abavela kwiSundowns bakhule kumaSpartans.
Uma iqembu likwazi ukunikeza iBafana abadlali abathathu kuya phezulu lifanelwe ukushayelwa ihlombe.
Kuloba uKanu Dube, eMlazi.