Iqembu lase-England iManchester City lizovivinya umdlali waKwaZulu-Natal, uKhulekani Nxumalo, oneminyaka ewu-18, ofunwa amaqembu ePSL.
Lo mdlali ozoba neminyaka ewu-19 maduze kubikwa ukuthi ugila izimnga kwiBritish Football Academy yasePinetown, edlala kwiDurban Central Premier League.
Ngokombiko we-iDiski Times, uNxumalo uzovivinywa yiMan City amasonto amabili.
Umqeqeshi wakhe uSiyabonga Mnganga uthi lo mdlali wabonwa wuYaya Toure kuqala, wabe esekhombisa umfowabo uKolo Toure oyingxenye yetechnical team kaPep Guardiola.
Abaphathi be-academy yeCity baxhumana nebaphathi beBritish Football Academy, nabo abase-UK, bacela ukuvivinya unxumalo eManchester.
“UYaya wavona ivideo kaSdah, wazisa umfowabo uKolo Toure ngayo, abaphathi baxhumana no Peter ngokomyalelo kaPaul Banks, oyingengxenye yama-scouts eMan City,” kusho uMnganga.
“USdah uzoziqeqesha noU21. Uzovivinywa amasonto amaboli. “
Ngaphandle kweCity uveze ukuthi amanye amaqembu ase UK okuyiQueens Park Rangers neBolton Waderers nabo bazimisele ngokuvivinya lo mdlali waseNchanga.
Khonamanjalo, kuleli kubalwa iMamelodi Sundowns, AmaZulu FC neDurban City kumaqembu azimisele ngokumsayinisa.
UNxumalo uthi kuyiphupho lakhe ukudlala e-England.
“Ngijabule ngaleli thuba eliyingqayizivele, yithuba elikhulu futhi umndeni wami ungijabulele.
“Yiphupho lami ukudlala e-England, ngisho ekhaya bayazi. Yisikhathi sokuthi ngisebenze kanzima.
“Uma ngithola iqembu kuzoba yinto enkulu ngoba ngizoba wumdlalli wokuqala wakuleli ukudlalela iManchester City. Lokho kuzogqugquzela nabanye.”