Kubikwa ukuthi iLiverpool iphezu kwezinhlelo zokuzama ukusayinisa umgadli weNewcastle United u-Alexander Isak obevutha engabaselwe ngesizini edlule kwiPremier League.
Ngokombiko weDaily Mail iLiverpool isafuna ukuqinisa isikwati sika-Arne Slot ngomgadli omusha kulandela ukudlula emhlabeni kukaDiogo Jota, kanye nokungagculiseki ngezinga likaDarwin Núñez okhonjwa eSaudi Arabia.
Ompetha bePremier League sebeqinise isikwati ngokusayinisa uFlorian Wirtz ngo-£116 million; yaphinde yasayinia uJeremie Frimpong obewuzakwabo kwiBayer Leverkusen kanye ne-left back ebidlalela iBournemouth uMilos Kerkez.
Manje kubikwa ukuthi izimisele ukuhlanganisa imali ebalelwa ku-£125 million ukuze ithole umgadli waseSweden u-Isak, kodwa ngeke yenze mnyakazo uma iNewscastle ingazimisele ngokuxoxisana nabo ngokuyidayisela. Kubikwa ukuthi ngasohlangothini luka-Isak umdlali uzimisele ngokujoyina iqembu likaSlot, kodwa uzozwa ngabaphathi bakhe ukuthi bathini ngoba akafuni ukuziqhatha nabalandeli be The Toon Army.
U-Isak ngesizini edlule uvalele amagoli awu-23 nama-assist awu-6 emdlalweni yePremier League, okusize iNewcastle iqede kunombolo 5 kwiligi, yazibekisela indawo kwi-UEFA Champions League.
Okwamanje iNewcastle isasayinise abambalwa kwitransfer window, oqaphelekile wu-Anthony Elanga emthathe kwiNottingham Forest. Kubikwa ukuthi ifuna ukusayinisa umgadli waseFrance odlalela i-Eintracht Frankfurt uHugo Ekitike, okwenza abaningi bakholwe wukuthi isilungiselela ukuhamba kuka-Isak.