Obewumdlali weStellenbosch FC, uMarc Van Heerden, uthi ujabule ngokujoyina iqembu elikhulu iCape Town City FC. 

UVan Heerden (34) ujoyina leli qembu esuka kwizimbangi zalo zaseWestern Cape kanti kulindeleke ukuthi aqinise ukhakhayi kubadlali abasebasha kulo. Ngesizini edlule iCityzens iqede kunombolo 2 kwiligi, yangena kwiCAF Champions League. 

UVan Heerden, oseke wadlalela i-Orlando Pirates naMaZulu phambilini, uthi uyibona isiyiqembu elikhulu kuleli iCape Town City. 

“ICape Town City FC iyiqembu elikhulu. Uma ubuka ukuthi isizuzeni esikhathini esifishane uyabona ukuthi yiqembu elikhulu. Kunabadlali abasezingeni, abancane nabadala…ngikujabulele ukuziqeqesha naleli qembu. Ngiyethemba ngizokwazi ukukhuphula izinga ngokuzama ukunikeza abadlali abasebasha ulwazi enginalo. Ngijabule ngekusasa lami kwiCity,” usho kanje. 

UVan Heerdan uthe uyethemba ukufika kwakhe kuleli qembu kuzomvulela indawo nasekuqeqesheni okuyinto azimisele ngayo. 

Ngaphandle kwalo mdlali, iCity ikhiphe imali eshisayo isayinisa isikhwishikhwishi saseGambia uKajally Drammeh yelula nezinkontileka zabadlali abayisize ukuthi ifinyelele kunombolo 2 ngesizini edlule.