Inkampani ephehla ugesi kuleli i-Eskom ithi zihamba kahle izinhlelo zokuguqula isimo njengoba sebenyukelwa yithemba ngokuqeda unomphela ukucinywa kukagesi.
I-Eskom ithi ukuzinza kwesimo esiteshini iMatla, eMpumalanga, kunomthelela ekumiseni uhlelo lokucinywa kukagesi. Sekuphele izinsuku ezingu-144 ungacimi ugesi eNingizimu Afrika.
Lesiteshi esiphehla ugesi ngelahle singesinye seziteshi ezimqoka ezaziqaphelwe ngelokhozi ohlelweni lwe-Generation Operational Recovery.
Lesiteshi siphakela izwe ngogesi obalelwa ku-7.1% kanti namalahle angakathintwa asemaningi kakhulu.
Imenenja-jikelele esiteshini iMatla, uMasarati Lesolang ubeke kanje.
“Ukuguquka kwesimo okudalwe ukukhula kwamandla okuphehla ugesi kubuyise imiphumela emihle kwezezimali ngonyaka ka-2023, kunomehluko omkhulu ngo-15%. Ukucinywa kukagesi kungalindelekile nokuphazamiseka kwengqalasizinda kwehle ngo-14%,” kusho uSebolang.
NgoLwesithathu, lesiteshi sivakashelwe ongoti emikhakheni eyahlukene okubalwa bezozibonela ngawabo amehlo.
I-Eskom iyaphoqeleka ukucima ugesi kwezinye izindawo ngokohlelo lwe-load reduction, okudalwa ukuthi Inkampani isuke ivikela ingqalasizinda.