Umengameli we-ANC uMnuz Cyril Ramaphosa uthi inhlangano ebusayo yenze umsebenzi oncomekayo eminyakeni ewu-30 edlule, abangakuboni lokho ‘bayizimpumphuthe futhi abezwa’.
URamaphosa uveze lokhu ekhuluma KwaNgcolosi, eThekwini, ngeSonto ntambama njengoba i-ANC iqhubeka nokukhankasela amavoti ngaphambi kokhetho olungo-29 May.
Sekucacile ukuthi inhlangano ebusayo izogxila kumsebenzi ewenze kusukela ngo-1994 kulolu khetho njengoba uRamaphosa efuna abavoti bebuke imisebenzi ye-ANC eminyakeni ewu-30 edlule.
“Abathi abawuboni umsebenzi we-ANC eminyakeni ewu-30 edlule bayizimpumputhe futhi kabezwa. Impilo eNingizimu Afika ayisafani uma siqhathanisa isikhathi esasikuso ngo-1994 nesanamhlanje,” kusho uRamaphosa.
“I-ANC isikhiphe kuhulumeni wobandlululo yasibeka la esikhona namhlanje. Namhlanje izinto eziningi ezenzekayo kuleli ziqhutshwa abantu bakithi beholwa yi-ANC. Abantu bethanda bengathandi, lelo yiqiniso eliphelele. I-ANC iyenzile imisebenzi eyisimanga eminyakeni ewu-30 edlule, futhi isazoqhubeka nayo.”