Owayengumdlali weKaizer Chiefs osebeka imibono yakhe ngebhola kuYouTube, uJunior Khanye, uthi iBafana Bafana iwinile phela kodwa iMorocco idlale ‘kangcono’ kunayo izolo ebusuku.
Ephawula ngemuva komdlalo iBafana ewunqobe ngo 2-0, uKhanye uthi ngemuva komdlalo ubezibuza ukuthi banqobe kanjani ngoba abadlalanga ibhola ‘elihle’.
“IBafana ibipake ibhasi kulo mdlalo, ithembele kumabhola amade. Amaqhinga omqeqeshi namhlanje asebenze kahle, ngimshayela ihlombe ngalokho. Kodwa ngisazibuza ukuthi bawine kanjani. Ngijabule njengomuntu wakuleli kodwa kumele sikhulume ngendlela abadlale ngayo,” kusho uKanye.
UKhanye uqhube wathi bekuzowushintsha umdlalo ukube iMorocco ikore ipenalty eyithole esiwombeni sesibili.
“Ngokwami ukubona iMorocco kumele siyishayele ihlombe ngoba adlalile amajita esiwombeni sesibili. NeBafana kodwa kumele siyincome ngendlela ehlele ngayo,” kuqhuba yena.
“Bengingazitsheli nje ukuthi iBafana ingashaya iMorocco.”
Uqhube wathi iBafana inqobe umdlalo ngethuba elivalelwe wu-Evidence Makgopa, kodwa wakucacisa ukuthi akamthandisisi lo mdlali kodwa umshayela ihlombe ngegoli.