Umqeqeshi weMorocco uWalid Regragui ukwamukelile ukukhishwa kwezakhe kwi-AFCON kulandela ukuhlulwa yiBafana Bafana ngo 2-0 ngoLwesibili ebusuku.
IMorocco ebithwele ngeqoma kulomqhudelwano, iwashiswe ijezi kwi-last 16.
U-Evidence Makgopa ushaye igoli lokuqala ngomzuzu-57, uTebogo Mokoena washayela isipikili sokugcina ngengcwenga ye-free kick esikhathini esengezwe unompempe.
IMorocco ilitholile ithuba eliyingqayizivele lokulinganisa kodwa u-Achraf Hakimi wayibhamuza kwezu kwamapali iphenathi.
“Senze amaphutha amaningi, sahluleka ukubekezela uma siqala ibhola emuva. Besixhamazela uma sidlala, sayeka ngokusebenzisa amathuba esiwatholile.
Bekufanele sinqobe esiwombeni sokuqala. Ukugeja amagoli kuyajeziswa kulesigaba ebesidlala kuso.
Sizamile, sakwazi nokuthola iphenathi kodwa sangayibeka enethini. Besizobuya emdlalweni ngegoli lokulinganisa. Ukugeja iphenathi kusilimazile.
Asikwenzanga obekudingeka, sihlulekile ukuqinisa kwezinye izindawo. Icala lokuhlulwa kweqembu lizothathwa yimina uqobo,” kuchaza uRegragui ekhuluma nabe-beIN Sports.
URegragui uthi akabasoli abadlali ngoba bazinikelile emdlalweni.
“Abadlali bazinikelile, balandela namaqhinga esibanike wona. Sizofunda kulomphumela wanamuhla. Asikaze siwubukele phansi umdlalo kodwa kufanele siyivume induku.
Sibaphoxe kakhulu abalandeli abasixhase kulomqhudelwano, bezokweseka iqembu. Ukuhluleka kweqembu kulele kimina njengomqeqeshi,” kubeka uRegragui