Ukapteni we-Arsenal, uMartin Odegaard uthi alikho iqembu abalesabayo kwi-UEFA Champions League kule sizini njengoba sebefinyelele kuma-quarter finals.
U-Odegaard ubeke kanje ngemuva kokudlulela esigabeni esilandelayo ngokugiqisa iFC Porto kumapenalty kuleli sonto.
“Sivuna ukudlala imidlalo esezingeni eliphezulu, silwele nezindebe. Sifuna ukubalwa kubantu abasembangweni. Alikho iqembu esingathi sifuna ukuligwema. Iwona mqhudelwano omkhulu kunayo yonke emhlabeni lo, ngisho singabhekana nobani kuzobe kuyiqembu elihle,” usho kanje.
I-UEFA izoqhatha amaqembu azobhekana kuma-quarterfinals eChampions League ngo-1 namhlanje ntambama. Kuwo kubalwa i-Arsenal, Atletico Madrid, Barcelona, Bayern Munich, Borrusia Dortmund, Manchester City, PSG neReal Madrid.