Kubikwa ukuthi isihamba phambili i-Orlando Pirates embangweni wokusayinisa izibabuli zabadlali bePolokwane City u-Oswin Appollis noThabang Matuludi.
Ngokombiko we-Unplayable, kuzophela leli sonto umdlali wePolokwane City neBafana Bafana u-Oswin Appollis esevumelene neBucs ngokuyijoyina. Ngaphandle kwakhe kubalwa nozakwabo uThabang Matuludi odlala ku-right back. Ukusayiniswa kukaMatuludi nokho kungase kuyidalele inkinga iPirates njengoba ivele inabadlali abathathu abahle ababanga uright back okunguBandile Shandu, Deano van Rooyen noThabiso Monyane.
NgokweTransfermarkt u-Appollis engabiza imali ebalelwa kuR11.3 million. UMatuludi ngakolunye uhlangothi kuthiwa engabiza uR7.5 million.
Uma begcina besayina kwiBucs kuzophoxa abalandeli abaningi beKaizer Chiefs. Kuzokhumbuleka ukuthi usomaqhinga weChiefs uKaizer Jnr waphumela obala ngesifiso nemizamo yokusayinisa u-Apppollis ngaphambi kokuthi kuqale isizini ka-2024/25.