Owayengumdlali weMamelodi Sundowns ne-Amiens SC yaseFrance uBongani ‘Ben10’ Zungu usechaze kabanzi ngokumenze waqoka ukujoyina AmaZulu FC.
UZungu nobengumdlali we-Orlando Pirates uSandile Mthethwa bamenyezelwe njengabadlali boSuthu izolo ntambama.
Ubesehlale izinyanga engekho emabhukwini eqembu lebhola elikhokhelayo kulandela ukuhlukana neSundowns ekupheleni kwesizini edlule. Ekhuluma ngesinqumo sokujoyina AmaZulu, uZungu ubeke kanje:
“Engihlose ukukwenza ukusiza iqembu likhuphuke kwi-log, ngisize abadlali abasakhula ngamava enginawo.
“Yonke indawo engidlale kuyo ngifike nganqoba izindebe, ngifuna ukufika nalowo mqondo. Ngiyazi okumele kwenziwe ukuze siwine. Ngizele ukuzowina.
“Ngijabule nangethuba lokusebenza no-Arthur Zwane noVusi Vilakazi. Sengiyibukele imidlalo yaMaZulu, adlala ibhola lesimanje. Indlela engiqonda ngayo ibhola izolekelela iqembu, kodwa ngiyazi kumele ngisebenze kanzima ukuze ngithole ithuba lokudlala.”
UZungu uke wazama inhlanhla nakwiWydad Athletic Club ephekwa wuRulani Mokwena kodwa kwangalunga njengoba kwavela ukuthi abaphathi beqembu babona isikwati sinabadlali basesiswini abanele.
BenoMthethwa bazothola ithuba lokungena esikwatini soSuthu uma selubhekana neMamelodi Sundowns ngesonto elizayo ngoLwesibili.