Amaphoyisa aseGreater Manchester asebophe amadoda amabili ngemuva kwesigameko sokudlova kwabalandeli e-Etihad Stadium, bezojabulela ukuwina kweManchester City kwi-Aston Villa.
IMan City iwine ngo 3-2 kwiVilla yize ibilandela ngemuva ngo 2-0 ngomzuzu ka-63. Ishaye amagoli amathathu emizuzwini elishumi, kwazalela ihlokohloko enkundleni sekuphele umdlalo. Ibinqoba iligi ihlandla lesine kumasizini amahlanu.
Kugcwale izinkumbi zabalandeli beCity sekuphele umdlalo, abanye babulala amapali nabanye bashunqisa ama-flares. Amaphoyisa aseGreater Manchester agcine ebophe abasolwa ababili okuvela ukuthi bahlasele unozinti weVilla uRobin Olsen.
Esitatimendeni esikhishwe iGMP, kuqinisekiswe ukuthi kuboshwe abesilisa ababili abasolwa ngezigameko zodlame ezahlukene. Sekuqalwe nophenyo nokuhlasela kuka-Olsen.
UPhillip Maxwell uboshwe ngecala lokuphosa isiqhumane enkundleni. Uzovela eNkantolo yeMantshi yaseManchester neSalford namuhla.
UPaul Colbridge ubekwe icala lokungena ngodli enkundleni, uzovela eNkantolo efanayo ngomhlaka 7 kuJuni.
ICity isithembise uswazi olunzima kumlandeli ozotholakala enecala lokuhlasela u-Olsen. Izomgweba unomphela enkundleni umlandeli ozotholakala enecala.