Umqeqeshi weKaizer Chiefs, u-Arthur Zwane, uphinde wakhala ngamathuba amagoli abawayekile bebambana neTS Galaxy ngo 0-0 koweDStv Premiership izolo.
Bekungokwesine iChiefs ibuya ne-draw kule sizini kumphumela oyishiye ihleli kunombolo 5, isele ngamaphuzulu amane kwiSuperSport United ekunombolo 2 obangwa amaqembu angaphansi kweMamelodi Sundowns.
“Asiqalanga kahle esiwombeni sokuqala kodwa ngokuhamba komdlalo besibacindeza kahle, siphethe ibhola phakathi nenkundla. Indlela esidlale ngayo ibisisebenzela ngoba sakhe amathuba amahle futhi bekumele okungenani sivalele amagoli amabili/amathathu.
“Esiwombeni sesibili siqale kahle kodwa sivele sathamba ngemuva kwekhadi elibomvu. Besidinga umuntu ozosiqaqela udonga lwabo yikho ngifake uGeorge, ngoba wonke umuntu ubesefaka ama-cross. Bengingamkhipha omunye umdlali wasemuva ngifake umdlali ohlaselayo kodwa bengidinga ukuqaphela ngoba bebesayingozi kwi-counter. Besingadlala kangcono esiwombeni sesibili. Bengizitshela ukuthi ngemuva kokukora amagoli amabili ePolokwane sizokwazi ukukora nakulomdlalo.”
IChiefs izobhekana neMaritzburg United koweNedbank Cup round of 32 ngoLwesihlanu ngo-19:30.