Abalandeli be-Orlando Pirates bazothola ithuba lokuzibonela umsebenzi owenziwa wu-Jose Riveiro eSpain njengoba uzokhonjiswa bukhoma kwiTV umdlalo wabo neqembu eliphekwa wuWayne Rooney iPlymouth Argyle FC.
Lo mdlalo oseBanus Football Centre, uzoqala ngo-7 kusihlwa, kanti abakwaSuperSport bamemezele ukuthi bazowuveza ku-202.
Kuzobe kuwumdlalo wokuqala we-preseason abalandeli abazothola ithuba lokuwubuka, okusho ukuthi kungenzeka babone nomdlali osanda kusayiniswa wase-Angola, uGilberto.
Ngaphandle kukaGilberto iPirates kusalindeke ukuthi isayinise abanye abadlali okubalwa kubo uSelaelo Rasebotja odlalela iSuperSport United, Thuso Moleleki odlalela i-Orbit College. Kulindeleke nokuthi iqashe u Devon O’Brien oyi-performance analyst kwiStellenbosch FC.
Ngesizini edlule iPlymouth iqede kunombolo 21 kwi-EFL Championship enamaqembu awu-24. Kulindeleke ukuthi uRooney ayithathe ayibeke kuma-playoff okungena kwiPremier League okungenani ngesizini ka-2024/25.