Obewumsakazi weGagasi FM uPenny Ntuli usegcine ekuqinisekisile ukuthi ngeke esaqhubeka nomsebenzi abewenza kulesi siteshi ngenxa yokungavumelani nabaphathi baso ngemali abezoyihola.
UMaNtuli ushicilele isitatimende ekhasini lakhe kuFacebook nakwi-Instagram lapho aveze khona ukuthi iGagasi belifisa ukumgcina, inkulumo yaphambana sekuvela umholo.
“Ukuqinisekisa ‘amahlebenzi’, yebo ngiyashiya emsebenzini. Bekuyisikhathi sokuvuselela izinkontikela, nganikezwa ithuba lokubuya. Ngivumile ukusebenza ohlelweni olusha konakala sengitshelwa ukuthi ngizohola uR2,800 ngenyanga. Le mali ayikho kude kwimali ebengiyihola eminyakeni emibili edlule.
“Ngike ngazizwa ngidelelekile kodwa ngehlisa umoya ngabuyela kubaphathi ukuyocela ukuthi bathi bawubuke kabusha umholo wami. Ngaleyo mali ngeke ngikwazi kwenza lutho,” kusho yena.
Uthe obengumphathi wakhe kwiGagasi ngesikhathi kudingidwa inkontileka yakhe wamcebisa ngokuthi kumele abheke ezinye izinto angazenza ngaphandle kokusebenza emsakazweni, okuyinto athi ivele yamqeda ukuzethemba.
“Ngibe sengithatha isinqumo sokuthi ngizocela bangabe besayivuselela inkontileka yami kulonyaka. Angiyekanga ngoba kukhona okungcono osengikutholile. Angiyekanga ngoba ngingasathandi, umuntu owazi mina uyazi ngilithanda kangakanani iGagasi FM kodwa kuyiqiniso ukuthi angibuyi, yize
ize kunjalo ngiyabonga kakhulu kwiGagasi ngethuba.”