Sphamandla Gumede
Ibibhalwe ebusweni indumalo kumqeqeshi weSwallows uBrandon Truter ezakhe zidlala ngokulingana ngo 2-2 zibhekene neChippa United eNelson Mandela Bay ngoMgqibelo.
IziNyoni zindize umdlalo ubekwa nje zishaya amagoli amabili emizuzwini elishumi. Amagoli ashaywe uKgaogelo Sekgota noRuzaigh Gamildien, kwayiwa ekhefini kunjalo.
ISwallows ibhacaze zibuya ekhefini njengoba idedele amagoli ashaywe u-Anthony Laffor noChidi Kwem esiwombeni sesibili.
“Umdlalo ubunzima. Ngiphoxekile ngomphumela, besihamba phambili ngamagoli amabili kodwa sahluleka ukunqoba umdlalo. Lomphumela ungiphoxile impela. Amaphuzu amathathu besiwaphethe kodwa senze amaphutha amabili emuva, sajeza ngamagoli. Sekuyimidlalo eminingi sidedela amagoli alula, kumele siyibheke lento,” kuchaza uTruter ekhuluma nabeSuperSport TV ngemuva komdlalo.
Lomphumela ubeke iziNyoni endaweni yesihlanu kwiligi, isele ngamaphuzu ayisikhombisa kwiMamelodi Sundowns ehleli esicongweni.
“Okuhle ukuthi sishaye amagoli amabili kodwa iyadumaza indlela esidedela ngayo amagoli. Iphuzu esilithole ekuhambeni lingcono kodwa kuyadumaza ukudedela amaphuzu amathathu,” kubeka lomqeqeshi.
Umgadli uGamildien uphume ngekhadi elibomvu kulomdlalo, okuchaza ukuthi uzophuthelwa imidlalo emithathu elandelayo. Lo mqeqeshi uthe yize kuzoba nzima ukudlala engekho uGamildien, ikhadi elibomvu belimfanele ngenxa yesenzo sakhe.