Iciko laKwaZulu-Natal uTNS lithi seliphilela ukubalekela umndeni ‘osuphenduke abathakathi’ abamjahe kusukela esakhula.

UTNS, ekhaya obizwa ngoNkazimulo Ngema, ubhale ekhasini lakhe kuFacebook ngoMsombuluko eveza ukuthi sekunesikhathi eside bezama ukumthakatha kubo.

“Ngaze ngabaleka ngibalekela umndeni osuphenduke abathakathi. Kudala ngithule kusukela ngisemncane bengifuna phansi, ugogo wami waze wangibalekisa ngaphambi kokuthi adlule emhlabeni. Kodwa impilo enjani le?” kuloba lo DJ odume ngamaculo okubalwa kuwo iMy Dali nethi Umona.

“Yazi kwesinye isikhathi ngizizwa ngifile noma ngihamba ngenxa yokhwantalala oludalwe impatho engiyithole emndenini kusukela ngisemcane.”

Kuma-comments kukhona ilungu lomndeni elizibize ngonina, elithe: “ngibuhlungu ngoba yonke lento oyikhulumayo ayikho nje wena ubalekal ikhaya. Akhomuntu la ofuna ukuk’bulala. Ukufa mfana kuk’fica nala ukhona…umawakhe lo okhulumayo. Engifuna ukuktshela khona mina uzolikhumbula leli khaya olibalekelayo, anginawo amaningi. Ngiyabonga.”

UTNS umphendulile eqinisekisa ukuthi uyilungu lomndeni wathi nguye umthakathi wokuqala lo ocashe ngomfowabo omncane nengane yakhe ‘enenhliziyo embi’.

“Yazi lo okhuluma la uyingozi ukudlula laba abangishaya ngezipoki nabangithumela ngemithi emnyama…uyingozi ngenhliziyo wena uwedwa nje.”

Ethintwa yiZimoja ngalolu daba uTNS unqabile ukuphawula.