Umdlali weGolden Arrows uTebogo Tlolane uthembisa ukuzikhandla ekukhuphuleni iqembu elisefomini enhle kulezinsuku.
UTlolane ojoyine i-Arrows ngo-Agasti esuka kwi-Orlando Pirates, ubonakala esengena egiyeni leqembu njengoba liyiqale kahle isizini ka-2023/24.
Lomdlali ushaye ingcwenga yegoli kwiCarling Knockout beshaya iCape Town City. UTlolane (28) unemidlalo emine kuBafana Bes’thende kule sizini.
“Ngiyabonga kubaphathi ngethuba lokudlalela i-Arrows. Ngifuna ukuzimisela uma ngithola ithuba.
“Kuyisibusiso ukudlala kwi-Arrows, ngijabuliswa ukugijima enkundleni futhi, uthando lwebhola luvukile.
“Ngiyajabula ngegoli engilishayile, ngizokwengeza okuthize eqenjini. Bengineminyaka emibili ngingakaze ngishaye igoli. Ngibuyelwa ukuzethemba, sekusele ngiphakamise izinga emdlalweni,” kusho uTlolane ekhuluma nabezindaba.
UTlolane uthi usewulindele ngabomvu umdlalo weDSTV abazowudlala neKaizer Chiefs ngoMgqibelo eMpumalanga Stadium, eHammarsdale.
“Siyayazi ingcindezi yokudlala neChiefs. Sikhulumile ngayo. Silindele inkundla egcwele ngoba sizodlala neChiefs. Kufanele sizimisele, umdlalo siwulungiselele njengoba senza kweminye,” kusho uTlolane.
UTlolane ukhuze ozakwabo ngokuyithatha kancane iChiefs ngoba ibuya endukwini yaMaZulu.
“IChiefs isengasijikela esiswini. Siyayihlonipha iChiefs kodwa sizolwela ukuyehlula ngoba siyihlelele.