Ukunqoba ngo 3-1 emdlalweni weDSTV Premiership wangempelasonto kunyuse ukuzethemba kumqeqeshi weCape Town City u-Eric Tinkler oveze ukuthi uzibekele umbandela wokuqeda kwi-top 4 uma ehlulwa ukubeka iqembu endaweni engaphezulu kwaleyo.
ICity inenebule iRichards Bay ngo 3-1 ekhaya layo eKing Zwelithini ngeSonto. Amagoli amabili ashaywe uJaedin Rhodes, elilodwa labekwa wuKhanyisa Mayo.
“Imidlalo elishumi ifana nokufinyelela esigabeni esiphakathi nendawo kwiligi. Sisaqoqe amaphuzu angu-16. Sizokwazi ukuwaphinda kabili amaphuzu sifike ku-32, siphinde sikhuphuke sifike ku-48. Lawomaphuzu azosibeka endaweni yesine noma eyesithathu.
Kungenzeka izintatheli zibuke ukuthi sihlulwe imidlalo emithathu ilandelana, mina ngibheka amaphuzu esiwaqoqayo, ngiwahlanganise uma sekuphela isizini,” kuchaza uTinkler ekhuluma nabezindaba sekuphele umdlalo.
UTinkler uthi amaphuzu angu-40 azoqinisekisa indawo kwi-top 8.
“Amaphuzu angu-40 akubeka kwi-top 8. Ukuqeda endaweni yesibili kudinga amaphuzu angu-55,” kubeka uTinkler.