Isibabuli seLamontville Golden Arrows uNduduzo Sibiya sikhathazekile ngokubhekana neKaizer Chiefs ngoba umqeqeshi wayo obambile, uCavin Johnson, kungenzeka afike neqhinga abangalilindele.
I-Arrows izokwamukela iChiefs emdlalweni weDSTV Premiership ozobanjelwa eMpumalanga Stadium ngoMgqibelo ngo-15:30 ntambama.
UJohnson ubekwe njengomqeqeshi wesikhashana ngemuva kokuxoshwa kukaMolefi Ntseki ngoMsombuluko.
Ekhuluma nabezindaba ngoLwesibili, uSibiya uthi abanalo ulwazi ngamaqhinga azosetshenziswa uJohnson.
“Asinalo ulwazi ngamaqhinga nesitayela sikaCavin Johnson. Lokho kungenzeka kusiphazamise emdlalweni. Izinto z
zizohamba kahle uma sizilungiselele ngendlela.
Asikwazi okuhlelwa uJohnson, iChiefs angeke ifune ukuhlulwa komunye umdlalo. Kuzoshuba ngoba bahluliwe emdlalweni odlule. Asifuni baqale ngathi ukuthola imiphumela emihle,” kuchaza uSibiya.
I-Arrows iyiqale ngegiya eliphezulu isizini ka-2023/24 njengoba ihleli endaweni yesibili kwiligi ngemuva kwemidlalo engu-8.
Abafana Bes’thende badlulele kuma-quarterfinals eCarling Knockout ngempelasonto beshaya iCape Town City ngo 3-1.
USibiya (28) uthi bahlele ukuyinqoba yonke imidlalo yasekhaya kulesizini. Ubalula ukuzimisela ejimini njengesizathu sokudlala ingcwenga yebhola.
“Imiphumela ebonakala enkundleni siyilungisa ejimini. Besihlele ukunyusa amasokisi ekuqaleni kwesizini, siqoqe amaphuzu. Sincamela ukubuya nephuzu elilodwa okungenani uma singawinanga ekhaya,” kuchaza uSibiya.
USibiya uthi abadlali bawulindele ngabomvu umdlalo weGlamour Boys kodwa angeke bayihloniphe.
“Imidlalo siyihlelela ngendlela efanayo, akukhethile ukuthi sidlala neChiefs. Kufuneka sibaqaphele ngoba banomqeqeshi omusha,” kuchaza uSibiya.