Umqeqeshi weChippa United uThabo September usola umoya wezikhova kubantu abangavumelani nabadlali abasayina emaqenjini aphesheya kwezilwandle bengakavuthwa ngokweminyaka.

USeptember ubeke kanje ephawula ngomdlali weSuperSport United uShandre Campbell omataniswa neClub Brugge yaseBelgium neFeyenoord yaseNetherlands kulandela ukushaya into ecokeme ngesizini ka-2023/24.

UCampbell (19) uvalele enethini amagoli amahlanu, wakhandela nozakwakhe amagoli ayisithupha kuyona yonke imiqhudelwano.

“Lenkulumo ijika imiqondo yabadlali ngokuyozama (Europe) ekubeni kuyinto enhle ukuyodlala phesheya kwezilwandle. Kungani kunemibuzo ngokulungela ukuyodlala phesheya kwezilwandle? Ukhona umdlali ongazibona ekulungele ukuyodlala phesheya ekubeni engakaze adlale khona?” kubuza uSeptember ecashunwa iSowetan.

USeptember wayepheka uCampbell kwinkulisa yeSuperSport engakakhushulelwa eqenjini elikhulu. Lomdlali wabasela enethini amagoli angu-16 kwiDStv Diski Challenge ngesizini ka-2022/23, wahlabana ngendondo yomdlali ovelele.

Oyimenenja kaCampbell, uMike Makaab usanda kuveza ukuthi lomdlali kungenzeka angabuyeli kwiSuperSport ngesizini ezayo.

Yize kukhona abadlali abahlulekayo ukuzinza emaqenjini aphesheya kwezilwandle, uSeptember ufuna ayozizwela amanzi ngobhoko uCampbell. 

UCassius Mailula, Njabulo Blom no-Olwethu Makhanya bathwele kanzima kwiMajor Soccer League e-USA. Umqeqeshi weBafana Bafana uHugo Broos wayephikisana nesinqumo sokusayina kukaMailula noBlom e-USA, ekhala ngokuthi basebancane ngokweminyaka.

USeptember ubona ezomelana nobunzima uCampbell ngoba unokhakhayi oluqinile.

“Ukungalungi kwezinto akuchazi ukuthi uyisahluleki. UCampbell usemncane, unesikhathi sokulungisa amaphutha. Umuntu ongakwazi nokuzama uyena oyisahluleki. Unekhono elimangazayo uShandre. 

“Akahambe eyozama uma kuvela ithuba. Ngikholwa ukuthi uzomelana nenselelo. Unomqondo omuhle futhi nomndeni wakhe uyameseka. Ngibona enethuba lokwenza kahle lapho azosayina khona,” kubeka uSeptember.