Umqeqeshi weMamelodi Sundowns uRhulani Mokwena uncome uzakwabo uManqoba Mngqithi ngesinqumo sokufaka uThapelo Morena esuka ebhentshini, wagcine enqobe nendondo yomdlali ovelele emdlalweni.
IDowns izigwazele ibhece kwiStellenbosch iyixebula ngo 3-0 eLoftus Stadium ngoLwesithathu.
UMorena ukhande amagoli amabili njengoba engene esiwombeni sokuqala ezovala indawo kaGaston Sirino ophume eselimele.
Ekhuluma nabeSupersport TV, uMokwena uthe uMngqithi ophakamise isinqumo sokufaka uMorena kusukela umdlalo ungakaqali.
“Ngithanda ukushayela ihlombe umqeqeshi uManqoba. Uyena obekhuluma ngesinqumo sokushintsha ngoThapelo kuqala. Uphindile wabeka igama likaThapelo sesikhuluma ngabadlali abazoshintshwa,” kubeka uMokwena.
UMokwena ugculisekile ngokuzimisela kwabadlali kulomdlalo yize ebone kushoda kwezinye izindawo.
“Sijabule ngendlela esidlale ngayo, sifake umgqigqo omkhulu, sanyusa igiya, amandla nomfutho kusukela ekuqaleni. Kodwa Siyazi ukuthi asikafiki ezingeni lethu, kusafanele sisebenze kanzima,” kubeka lomqeqeshi.
Ebuzwa NgoMarcelo Allende oshaye igoli lokuqala emdlalweni wakhe wokuqala kwiDowns namuhla, uMokwena uthe basayine umdlali osezingeni kuMarcelo.
“URushine udlale kahle, uBrian Onyango, Andile Jali badlale kahle. UNeo (Maema) ulandele yonke imiyalelo yethu. UPeter Shalulile usebenze ngokuzikhandla, njengenjwayelo.
Kufanele sikhulume ngeqembu lonke. Kodwa ngijabule ngoMarcelo. Kudingeka sibekezele ngaye. Kusafanele azame ukujwayela iqembu, siyakwazi esingakulindela kuye.
Iqembu lisebenze kanzima limsayinisa, sibonga abaphathi ngokuthola umdlali osezingeni,” kuchaza lomqeqeshi.