Umqeqeshi weMamelodi Sundowns uRulani Mokwena ugxeke unompempe ngamaphutha wabhanqa nabadlali bakhe kulandela ukuthola iphuzu elilodwa bebhekene ne-Orlando Pirates emdlalweni weDSTV Premiership eLoftus Versfeld ngoMgqibelo.
ISundowns ihluleke yancama ukudlala ibhola elidla utshani eLoftus ebigcwele phama abalandeli abekade bezobukela uThembinkosi Lorch.
EzikaRulani ziqale lomdlalo ngaphandle kwezethenjwa eziyisikhombisa ezisanda kubuya kwi-AFCON.
IDowns ihambe phambili ngegoli likaMarcelo Allende ngomzuzu ka-76. EzikaMagebhula zithole elokulinganisa ngemuva kwemizuzu emine, okube yiphenathi evalelwe uTapelo Xoki.
“Angiyithandanga indlela esidlale ngayo. Besihluleka ukuphasa ibhola, besingawufaki nomfutho. Besingakwazi nokuqinisa uma kubangwa ibhola.
Iqembu lingimangazile kodwa ngibadonse ngendlebe sisekhefini. Siwalungisile amaphutha esiwombeni sesibili kodwa ngisakhala ngento engiyibonile,” kuchaza uRulani.
IBucs iqede umdlalo ingasaphelele ngenxa yokukhishwa kukaMiguel Timm ngekhadi elibomvu esiwombeni sesibili.
Lomdlalo ubuphazanyiswa ukuxabana kwabadlali, obekudala ukuthi unompempe uThando Ndzandzeka awumise.
“Angiwuthandanga umdlalo, ibhola libukeka kangcono uma amaqembu ezodlala ibhola elingcono, nonompempe elawule kahle umdlalo.
Womabili amaqembu ashaye udaka namuhla, ngibala nonompempe lapho. Iqembu lami libhacazile, kufanele ngivume njengomqeqeshi. Belibheda ibhola engilibuke namuhla.
Bekungadlalwa ibhola namuhla, bekuliwa ngezindololwane. Unompempe ubengakwazi ukulawula umdlalo. Angifuni ukuphawula ngonompempe, kungcono ngivale umlomo. Alikaze lingijabulise ibhola engilibuke namuhla,” kuchaza uRulani.
ISundowns idlale engekho u-Aubrey Modiba, Mothobi Mvala, Grant Kekana, Khuliso Mudau, Teboho Mokoena, Themba Zwane noThapelo Maseko ababuye maphakathi nesonto neqembu lesizwe.