Umqeqeshi weWydad Casablanca uRulani Mokwena ukhuze eyokuxhamazela kubadlali bakhe kulandela ukunqoba ngembudlu yamagoli bexebula iJS Soulem ngo 3-0 koweBotola Pro, ngoMgqibelo.
IWydad ibiqala ngqa kulesizini ukunqoba imidlalo yeligi emibili ilandelana. Lomphumela uyikhuphulele endaweni yesithathu, ngemuva kweRS Berkane eqhwakele esicongweni namaphuzu angu-27 yize inomdlalo esandleni.
ISoulem yaxebula iWydad emizuliswaneni emibili ngesizini ka-2023/24.
URulani uvume ukushuba kombango weligi, waveza ukuthi akufanele bajabule ngokweqile njengoba benqobile.
“Ushubile umbango weligi kwiBotola, amaqembu acishe alingane ngokwezinga. Alikho iqembu elihamba lodwana ngezinga.
“Ngiyajabula uma singaxhamazeli siyiqembu. Kubalulekile ukuthi siqonde isimo esikuso. Ukuba ngumholi kudinga ukuthi uhlale uyiqaphile indlela oyihambayo.
“Kuyaqala ngqa onyakeni ukuthi sinqobe imidlalo emibili ilandelana. Kufanele sijabule ngokuphunyuka kulesibopho, sidlulele phambili.
“Sinqobe umdlalo wesibili kulandelana sibhekene neqembu elasiphuca amaphuzu ayisithupha ngesizini edlule. Sithole umphumela ogculisayo sitholene neqembu elijwayele ukuba yinkinga,” kubeka uRulani esithangamini nabezindaba
URulani uthi akufanele bazithwale ngoba luselude ukhalo kwiligi.
“Ukudlula ebunzimeni kuzobuyisa ukuzethemba ngoba sifuna ukuvusa iqembu, libuyele ezingeni. Kufanele sizithobe, singakhohlwa yizibopho esizibekile.
“IWydad iyiqembu elikhulu ngokomlando nangesibalo sabalandeli. Kukhulu okulindelwe kuleliqembu.
“Akufanele sixhamazele ngenxa yokunqoba umdlalo owodwa. Kumele sizithobe, siqhubeke nokuzikhandla, sibumbane ngenhloso yokubuyisela iqembu ezingeni.
“Sinenhlanhla enkulu yokwesekwa abalandeli abaningi, abathanda iqembu ukubhubha. Kufanele sikhombise ukubabonga nsukuzonke abalandeli,” kubeka uRulani.