Umqeqeshi weMamelodi Sundowns uRulani Mokwena uthi uzoyishayela isigxiviso sokuyijabulela isizini ka-2024/25 uma bengakwazi ukubuya neMTN 8, Nedbank Cup neCAF Champions League, okuyimiqhudelwano ebaphunyuke sebeyibukela eduze ngesizini edlule.
URulani (37) uqokwe njengomqeqeshi ovelele kwiDStv Premiership ngemuva kokuhola iqembu likhala lemuka neligi ihlandla lesikhombisa kulandelana. IDowns iphinde yaqukula i-African Football League (AFL).
I-Orlando Pirates yajabhisa amaBrazilians ngesizini ka-2023/24, enqoba kowamanqamu weMTN8 ngo-Okthoba, aphinda okufanayo koweNedbank ngoJuni.
Leliqembu laseChloorkop laphinde latholana nembibizane kuma-semifinals eChampions League, likhishwa yi-Esperance ngo 2-0 sekuhlanganiswe imiphumela yemilenze emibili.
Akukho ukuphumula nangesizini ezayo njengoba iDowns izophinde igijime kwimiqhudelwano eyisithupha uma sekubalwa neyase-Africa.
URulani uthi nerekhodi lamaphuzu bafuna ukulidlula ngesizini ezayo.
“Ngizibekele umbandela wokwenza kangcono ngesizini elandelayo. Lokho kuchaza ukunqoba iMTN8. Sihlulwe sekukhahlelwa amaphenathi kowamanqamu. Kufanele sibuye nendebe (MTN8). Sizolwela nokulidlula irekhodi lamaphuzu kwiligi, sizame ukuyivikela.
“Sihlele ukubuya neChampions League kodwa angifuni ukuzifakela ingcindezi. Ngizibekele umbandela wokufinyelela kowamanqamu ngesizini ezayo. Kuyaphoqa ukufinyelela kowamanqamu,” kuchaza uRulani ekhuluma emsakazweni iPower 98. 7FM.
IDowns yayikade ikhishwe yiWydad Athletic kuma-semifinals eChampions League ngesizini ka-2022/23.
“Kumele sikhombise ukuvuthwa, lokho kuzofakazelwa ukuthi sifinyelele kowamanqamu weChampions League. Ukwenza njalo kuzosinikeza ithuba lokuyinqoba.
“Angeke ukhulume ngokuwina iChampions ekubeni kusenzima nokungena kowamanqamu. Sesifinyelele kuma-semifinals amahlandla amabili kulandelana, kufanele sizibekisele indawo kowamanqamu, ngizobona lapho ukuthi sishoshela phambili.
“Umbandela weCarling Cup owokudlulela kumzuliswano wesibili. Sizibekele ijoka lokunqoba iNedbank Cup,” kubeka uRulani.
IDowns izolibangisa e-Austria, nokuyilapho ezoqala khona amalungiselelo esizini ka-2024/25.