Umqeqeshi weMamelodi Sundowns uRulani Mokwena ubongele abadlali ngokuqhuba umgqigqo wokunqoba kwiligi yize benze izinguquko ezilishumi esikimini esiqale emdlalweni weDSTV Premiership neCape Town Spurs eLoftus Stadium ngoLwesithathu. ISundowns ixebule iSpurs ngo 3-0 kulo mdlalo.
Lomphumela uqhube irekhodi leDowns lokunqoba yonke imidlalo engu-11 kwiligi selokhu kuqale isizini ka-2023/24.
IDowns ivule igebe lamaphuzu angu-8 esicongweni seligi yize isanemidlalo emithathu esandleni. ISpurs sisayibambe emsileni kwiligi.
URulani ubongele abadlali ngokuzikhandla bebuya namaphuzu agcwele.
“Ngisazowubukela lomdlalo. Ngikhulume kabi ngemidlalo yangesizini edlule yize ngingayibukanga kahle.
“Bekwenzeka ngiphaphazele uma sinqobe ngamagoli amaningi. Bengishintsha umqondo uma sengibukela umdlalo ngisendlini. Angisathandi ukuphawula kakhulu ngomdlalo engiwubukele ngisenkundleni.
“Ngiyaziqhenya ngabadlali ngokuzikhandla kwabo ngoba ngibagxekile ngomphumela odlule. Bengingagculisekile ngebhola esilidlale emidlalweni edlule, sishaye into ecokeme namuhla.
“Besiliphethe ibhola emdlalweni, sakhombisa ukungakhathali. Besihlangene ngokohlaka. Sishintshile sekungene uBongani Zungu, bekungafani nangesikhathi kukhona uGrant (Kekana) nabanye abadlali,” kuphendula uRulani esithangamini nabezindaba.
Sipho Mbule's rocket pic.twitter.com/sE3Box37oc
— Raymond Monty Maboea (@RayMaboya) December 13, 2023
URulani uthi kumjabulise kakhulu ukunqoba yize benze izinguquko eziningi kulomdlalo.
“Kufanele siligcine lelizinga, akudingeki sithambise nakancane. Ngijabule ngoba siyakwazi ukuqhubeka nomgqigqo, asixhamazeli. Kumele siqhubeke nokuzithoba,” kuchaza uRulani.