Umqeqeshi wePortugal uRoberto Martinez akayizwa eyabantu abasola ukuthi uCristiano Ronaldo ubizwe esikwatini se-EURO 2024 ngenxa yegama lakhe.
URonaldo (39) ubuya ihlandla lesithupha kumqhudelwano we-EURO aqala ukugijima kuwo ngonyaka ka-2004 esaneminyaka engu-17. Lomgadli unerekhodi elikhethekile kwi-EURO njengoba eseshaye amagoli angu-14 emidlalweni engu-25 kulomqhudelwano, okuyinto engakaze yenziwe ngaphambilini.
URonaldo waqala ebhentshini ezakhe zikhishwa yiMorocco kwiNdebe yoMhlaba ka-2022 eQatar, kwalandela izindaba zokuthi kungenzeka abeke amakhokho ethala eqenjini lesizwe.
Lomgadli akazithelanga ngabandayo yize wathwala kanzima eQatar eshikiliswa uGoncalo Ramos ayebanga naye isikimu. URonaldo wajoyina i-Al Nassr yaseSaudi Arabia. Ushaye amagoli angu-50 kwi-Al Nassr ngesizini ka-2023/24, waziphendlela isikhala esikwatini sikaMartinez.
“UCristiano useqenjini ngoba kumfanele. Akekho umdlali obizelwa eqenjini lesizwe ngesizathu sokuba negama elikhulu. UCristiano ushaye amagoli angu-50 emidlalweni engu-51 eqenjini lakhe. Usishayele amagoli angu-9 emidlalweni yokuhlungela i-EURO.
“UCristiano ubhakuzisa inethi, simthembile ukuthi aqedele amathuba esizowakhanda. Uyakwazi ukugqobhoza udonga avule nezikhala enkundleni. Kuningi okushintshile ngebhola likaRonaldo eminyakeni edlule. UCristiano uyingxenye yeqembu lesizwe ngoba ukusebenzele lokho, amagoli akhe ayakufakazela ukubizwa kwakhe,” kuchaza uMartinez ecashunwa abeBBC Sport.
URonaldo usethubeni lokuqala kowokuvula uGroup F uma ezakhe sezitholana neCzech Republic eLeipzig Stadium namuhla ebusuku. Lomgadli wabonakalisa ukuthi ululeme ngokugcwele ebhakuzisa inethi kabili ngesikhathi beshaya i-Ireland ngo 3-0 emdlalweni wokulungiselela i-EURO.
Oyisitobha sePortugal uRuben Dias ukujabulele ukudlala noRonaldo ambona esanentshisekelo yokunqoba.
“URonaldo uyasikhuthaza, ukudlala naye kufakazela ukuthi amaphupho ayafezeka. URonaldo uyasigqugquzela ngezindlela ezahlukene, ngiyajabula uma esayingxenye yeqembu.
⚽ 4'
— CentreGoals. (@centregoals) June 15, 2024
⚽ 44'
⚽ 88'
Six years ago today, Cristiano Ronaldo did this to Spain at the 2018 World Cup 🇵🇹⚡ pic.twitter.com/cytyIn4hB9
“Ukudlala kwakhe eqenjini lesizwe yize iminyaka isihambile kukhombisa ukuthi usanentshisekelo yokuwina. Ungukaputeni wethu, sizolandela iziyalo zakhe,” kubeka uDias.
URonaldo useshayele iPortugal amagoli angu-130 emidlalweni engu-207 kusukela aqala ukugijima eqenjini lesizwe ngo-2003.
IPortugal iyizimfivilithi kuGroup F lapho iqhathwe khona neCzechia, Georgia neTürkiye.