Umqeqeshi we-Orlando Pirates uJose Riveiro uthi akanayo incazelo ngokugeja kwabadlali bakhe phambi kwamapali. IBucs ithole isibhaxu okokuqala kulesizini ibhekene neChippa United e-Orlando Stadium.
IPirates ibiwuphethe umdlalo kodwa igcina ngokuba buthuntu phambi kwepali. U-Abdi Banda ushaye igoli ngomzuzu ka-86, wasiza iChilli Boys inqoba okokuqala kulesizini kwiDSTV Premiership.
IBucs yabhacaza ngendlela efanayo ibhekene neSwallows, ihluleka ukuqedela amathuba amaningi eyawakhanda. Isifo sokugeja saqhubeka ngisho sebebhekene neStellenbosch FC emdlalweni owaphela ngo 1-1 ngesonto eledlule.
“Kunzima ukuchaza ukuthi sishaye igoli elilodwa emidlalweni emibili (Swallows & Chippa). Asikwazanga ukukhanda amathuba amaningi sibhekene neStellenbosch kodwa sishaye igoli elilodwa kuphela emidlalweni eminye.
Kunzima ukwamukela. Namuhla besiphethe umdlalo ngo-70%, sashaya epalini amahlandla angu-17. Lilodwa ibhola elifike epalini, amanye abehamba eceleni kwepali. Kuyabonakala ukuthi siyafisa epalini, namathuba siyawakhanda. Kunzima ukuqedela amathuba,” kubeka uRiveiro ekhuluma nabeSupersport TV.
UKwame Peprah, Bienvenu Eva Nga, Deon Hotto noThabang Monare bahlulwe oqekelele bamathuba. URiveiro ukholwa ukuthi ukwehla kwezinga lokuzethemba yikhona okudala ukuthi abadlali bashwebe amagoli.
“Kufanele sizethembe ukuze izinto zizoshintsha. Angikhulumi nabagadli kuphela, bonke abadlali bayawathola amathuba. Kufanele siwasebenzise amathuba, sijime kanzima ukuze abadlali bezonyukelwa ukuzethemba,” kubeka lomqeqeshi.
URiveiro uthi useliqonda kangcono iqembu lakhe ngemuva kwemidlalo emithathu kwiligi.
“Senginolwazi oluningi ukudlula izinsuku ezingu-8 ezedlule. Sidlala imidlalo eminingi, siyadlala nangoLwesithathu. Sengiyabazi abadlali abasezingeni. Iligi isanda kuqala ngoba sesidlale imidlalo emithathu kuphela. Kufanele ngabe sijabulela ukunqoba namaphuzu ayisikhombisa, kodwa sihleli emaphuzwini amane.
Sinomunye umdlalo eThekwini, sifuna ukuyoqinisa isandla kuwo, sikhande amathuba amaningi, ngithemba nokuthi sizokwazi ukukhanda amathuba. Sifuna amaphuzu amathathu, sizowanqoba ngenkani,” kubeka lomqeqeshi.
IPirates izobhekana neRoyal AM eMoses Mabhida Stadium ngoLwesithathu. Umdlalo uzoqala ngehora lesikhombisa ntambama.