Umqeqeshi we-Orlando Pirates uJose Riveiro uncome umgadli uZakhele Lepasa oshaye amagoli amabili ezakhe zihlulwa iTS Galaxy ngo 2-0 e-Orlando Stadium namuhla.
Lomphumela unyusele iBucs esicongweni seDSTV Premiership okwesikhashana.
ULepasa (25) ubehlushwa ukulimala kusukela abuyiswa eqenjini elikhulu njengoba ebekade ebolekiswa.
Lomgadli ubesadlale emidlalweni engu-34 kuphela kwiBucs kusukela akhushulelwa eqenjini elikhulu.
Kubukeka ezelwe kabusha uLepasa osedlale imidlalo emithathu ilandelana kwiligi. Igoli lokuqala lingene ngomkhonto ogwaze ekhaya kuGiven Msimango obecindezelwe uLepasa. Elesibili lishaywe yilomgadli engaphandle kwebhokisi.
“Sinabadlali abahle kuzona zonke izindawo. Namuhla besifikile isikhathi sabo. Bonke badlala kahle ngoba iqembu lihleleke kahle.
Kusebenza inhlanhla nokuzethemba uma usuthole isikhala ebhokisini. UZakhele uyazethemba, okuyinto emsebenzelayo njengomgadli.
Kuyenzeka ungawashayi amagoli, ushaye eceleni. Namuhla inhlanhla iqondane nathi. Ngiyathemba lokhu kuyinkomba yokuqala kwezinto ezinhle phambi kwamapali. Inhlanhla sizoyidinga emidlalweni ezayo. Ngijabule ngabadlali bami,” kubeka uRiveiro.