Umqeqeshi we-Orlando Pirates uJose Riveiro ubone besindiswe unozinti uMelusi Buthelezi nezitobha bephunyuka kunzima emdlalweni weDSTV Premiership abawunqobe ngo 1-0 bebhekene neTS Galaxy ngoMgqibelo ebusuku.
UDeon Hotto ushaye ingcwenga ye-free kick eweze iBucs e-Orlando Stadium.
IGalaxy ithole amathuba amabili ayingqayizivele kusaqala umdlalo. Kusize uButhelezi evimba amahlandla amabili kanye noFortune Makaringe ovale ibhola ebelibheke enethini.
URiveiro uthi iBucs isinde emlonyeni wengwenya ngoba iGalaxy ibithelwe ngezibonkolo kusaqala umdlalo.
“Sithole amaphuzu abalulekile, sesinqobe imidlalo emibili ilandelana ekhaya. Bekunzima ekuqaleni ngoba asikwazanga ukulandela amaqhinga ebesiwahlelile.
Sinikeze izitha amathuba amathathu abeyingozi. Sibonga uMelusi nezitobha abasitakulile ngoba umdlalo ubungashintsha zibekwa,” kuchaza uRiveiro ekhuluma nabeSuperSport TV.
IPirates inyukele endaweni yesihlanu etafuleni njengoba isiqede imidlalo emihlanu ingayazi induku kwiligi. EzikaRiveiro zishiya omkhaya iKaizer Chiefs ngamaphuzu amabili.
“Sibuye kancane emdlalweni ngengcwenga ye-freekick. Ngibonga amaphuzu amathathu ngoba bekungelula. Sithole izikhala eziningi esiwombeni sesibili. Izitha bezivulekile, sakwazi nokukhanda amathuba.
Sizifake engcupheni ngokungalitholi igoli lesibili ngoba besimincele ukuthi iGalaxy ingabuyi emdlalweni. Angiboni sithwale kanzima namuhla, sisinde ngokuphunyuka emizuzwini elishumi yokuqala,” kubeka uRiveiro.