Umqeqeshi weMamelodi Sundowns, uRhulani Mokwena, uzifanise noMose noNoah basebhayibhelini ebuzwa ngomsebenzi wakhe kulandela ukunqoba imidlalo ewu-11 kulandelana.
ISundowns isinqobe imidlalo ewu-15 kulandelana kule sizini, kodwa uRhulani ube wumqeqeshi wokuqala ukunqoba imidlalo ewu-11 yokuqala eqeqesha iqembu lePSL. URhulani ubekwe njengenhloko yabaqeqeshi beSundowns kule sizini, edla umsebenzi abewenza ngokubambisana noManqoba Mngqithi.
Ebuzwa ngendlela izinto ezimhambela ngayo, uRhulani uthe umsebenzi wokupheka iDowns uwunikezwe wuMdali.
“Akekho ongathi ubekulindele ukuthi izinto zihambe kanje. UMdali akaze athi akuvotwe ukuze aqoke uNoah ukuthi amakhele umkhumbi. Waya kuNoah wamyalela ukuba akhe umkhumbi,” kuchaza uRhulani.
“Ngisho nami abanye abangibona kungangifanele ukuba wumqeqeshi weSundowns, uMdali wathi kimina ngifuna uhole laba bantu.
“UMdali akabacelanga abantwana bakwa-Israel ukuthi bavotele ozobahola nokuthi ubani ozobhekana noPharaoh…wathi ‘Mose, uwena ozongenzela lo msebenzi’ . Uma uMdali esekuqokile kumele uphakame wenze akucelayo kuwe.”
ISundowns izobhekana neRichards Bay FC namhlanje ngo-19:30 koweNedbank Cup.