Umqeqeshi weMamelodi Sundowns uRhulani Mokwena uyishayele ihlombe indlela eqeqeshwa ngayo iBrighton & Hove igxoba iManchester United ngo 3-1 e-Old Trafford kowePremier league.
I-United ibulawe ngenduku abalandeli baqala ukuphuma enkundleni kungashayi ngisho umzuzu ka-75 kukora oDanny Welbeck, Pascal Grob, noJoao Pedro. Igoli lokubika le-United livalelwe wuHannibal Mejbri obesuka ebhentshini.
Ngemuva komdlalo, uMokwena ubhale kanje uRhulani ekhuluma ngeBrighton: “IBrighton yiqembu eliqeqeshwe kahle. Liqeqeshwe ngokweqile, kodwa ngokweqile okusebenza kahle ngempela.”
Nasezinkundleni zokuxhumana baningi abababaza izinga leSeagulls, edlala isuka emuva ize iyolinamathisela enethini ngaphandle kokutatazela.
Okumangaza abaningi wukuthi umqeqeshi waleli qembu ushintshe abadlali abayisithupha eqenjini elixebule iNewcastle United ngo 3-1 emdlalweni wokugcina ngaphambi kwekhefu leFIFA.
Umphumela wayizolo ushiye umqeqeshi we-United, u-Erik ten Hag engaphansi kwengcindezi njengoba abaningi sebeqale ukumbuza ngabadlali abasayinisile selokhe efikile kwi-United.