Umqeqeshi weMamelodi Sundowns uRhulani Mokwena uvikele uMothobi Mvala okhishwe ngekhadi elibomvu zisuka emdlalweni womlenze wesibili weCAF African Football League bebhekene nePetro de Luanda ngoLwesibili ebusuku.
UMvala ukhishwe ngomzuzu wesithathu kulomdlalo ophele zibambene ngo 0-0 eLoftus Versfeld. Lomphumela ubeke iSundowns kwisemifinal ezoyidlala ne-Al Ahly.
IPetro yahlulwa iDowns ngo 2-0 emlenzeni wokuqala owawubanjelwe e-Angola ngesonto eledlule.
“Ngenze inqwaba yamaphutha empilweni yami ukudlula uMothobi Mvala. Ngizoyibheka i-video, ngihlole okwenzekile. Ngizokhuluma naye njengoba ngijwayele ukwenza nakwabanye abadlali abanamaphutha.
Abadlali bami bayawenza amaphutha. Ibhayibheli lifundisa ngokuxolela, ngiyathemba uyangiqondisisa. Siyabathanda abadlali bethu, ibhayibheli liyasho ukuthi uthando lwangempela luyaxolela.
Siyawahlola amaphutha enziwe abadlali, sizame ukuwalungisa. Empilweni kukhona amaphutha. Amaphutha ayindlela yokufunda, uthole izisombululo, uphinde ube ngcono.
UMothobi ngizomeseka njengoba ngenza kwabanye abadlali beqembu,” kuchaza uRhulani ekhuluma nabezindaba ngemuva komdlalo.
URhulani uthi kungadingeka kwehlulelwe wonke umuntu oseqenjini uma kunganakwa amaphutha.
“Uma siqala ukwehlulela, kufuneka sizibheke esibukweni sonke. Akekho umuntu omsulwa, ongalenzi iphutha. Siphila emhlabeni ogcwele abantu abathanda ukwehlulela abanye. Siyakhohlwa ngezethu izono.
Kufanele sifunde ububele. Umhlaba udinga abantu abanobubele ukudlula umoya wokwehlulela,” kuchaza uRhulani.
IDowns izodlala ne-Al Ahly emlenzeni wokuqala ngomhlaka 29 ku-Okthoba. Umlenze wesibili ungomhlaka 1 kuNovemba.