Umqeqeshi weTS Galaxy uSead Ramovic ukhala ngabahlaziyi bebhola bakuleli abangafuni ukuncoma iqembu lakhe yize lenza kangcono kulesizini.
IGalaxy idlulele kwi-last 16 yeNedbank Cup ngemuva kokuguqisa iGolden Arrows ngo 2-1 eMpumalanga Stadium ngoLwesihlanu.
IRockets ihleli endaweni yesikhombisa kwiDSTV Premiership namaphuzu angu-24 emidlalweni engu-16. Leliqembu lisefomini enhle selokhu kubuye iligi njengoba seliyinqobe yomibili imidlalo eliyidlalile.
EzikaRamovic zidayise abadlali abayisikhombisa ekuqaleni kwesizini, abajoyine iMamelodi Sundowns, Kaizer Chiefs, Orlando Pirates neCape Town City.
Yize iRockets ilahlekelwe inqwaba yabadlali, iqembu livuke lazithintitha, okufakazelwa ukuhlulwa kabuhlungu kowamanqamu weCarling Knockout Cup libhekene neStellenbosch.
URamovic uthi unganakwa kwempumelelo yeqembu yikhona okumphatha kabi.
“Abadlali bami abanconywa ngendlela ebafanele. Labantu abahlaziyayo abasinakile.
Namanje ongoti ababoni ukuzimisela kwethu ngoba sesinqobe imidlalo emine ilandelana kwiligi. Bazonconywa nini abadlali bami? Amanye amaqembu anconywa kakhulu uma enqoba imidlalo emihlanu ilandelana,” kuchaza uRamovic ekhuluma nabeSuperSport TV.
URamovic wakhala ngento efanayo ekhuluma nabeSuperSport TV ngemuva komdlalo weligi beshaya yona i-Arrows ngo 3-1 ngesonto eledlule.
Lomqeqeshi wasola abahlaziyi bebhola kuSuperSport TV ngokuziba ukuncoma iqembu lakhe njengoba lisefomini.
“Angifuni kunconywe mina, yiqembu elidlala ibhola. Ngibongela abasebenzi beqembu nabadlali okuyibona abafukuza enkundleni. Ngikholwa ukuthi abashayelwa ihlombe ngendlela ebafanele.
Sahlulwa kancane kowamanqamu. Iningi labahlaziyi lalicabanga ukuthi ifomu yethu izokwehla ngoba sihluliwe. Iqembu livuke lazithintitha, sesiwine imidlalo emine ilandelana, kunzima ukwenza lokho kwiligi.
Bekuzokhulunywa isikhathi eside ngelinye iqembu elinqoba imidlalo emine ilandelana,” kubeka uRamovic.