UMengameli wakuleli uMnuz Cyril Ramaphosa ufuna izimpendulo kuNgqongqoshe wezoBulungiswa nokuThuthukiswa koMthethosisekelo uNksz Thembi Simelane osolwa ngokubandakanyeka kwinkohlakalo eyawisa ibhange iVBS Mutual.
Ngokombiko weNews24 neDaily Maverick, uSimelane wathatha isikweletu sika-R500,000 kulelibhange elingasasebenzi.
Esitatimendeni esikhishwe ihhovisi loMbuso ngoLwesithathu, uRamaphosa uthe imshiye ekhathazekile lemibiko enemba uSimelane ngenkohlakalo.
Okhulumela ihhovisi likaMengameli uVincent Mangwenya uthi uRamaphosa ucele umbiko ophelele kuNgqongqoshe.
Imibiko yeDaily Maverick neNews24 iveze ukuthi uSimelane wabolekwa u-R500,000 ngo-Okthoba wango-2016, wabe esethenga isitolo esidayisa ikhofi endaweni yomntakabani eSandton, eGauteng.
Lombiko uqhuba uthi uSimelane wayenguMeya kuMasipala wasePolokwane ngesikhathi ebolekwa lemali. Kubikwa ukuthi uSimelane wasebenzisa isikhundla sakhe sobuMeya exhasa lelibhange ngo-R349 million ngokungemthetho.
USimelane ungaphansi kwenkulu ingcindezi njengoba amaqembu epolitiki emfuna eshenxile esikhundleni sokuba uNgqongqoshe.
NgoMsombuluko, i-ActionSA ibhalele uMvikeli woMphakathi uKholeka Gcaleka, icela ukuba aqale uphenyo ngemibiko yenkohlakalo ebhekiswe kuSimelane.
“I-ActionSA ikholwa ukuthi isithunzi sobulungiswa sizothunazeka njengoba uSimelane ephethe uMnyango wezoBulungiswa nokuThuthukiswa koMthethosisekelo. Kuyasithusa ukuthi umuntu onikezwe izintambo zokuqinisekisa ubulungiswa kuleli unembeke kwinkohlakalo. Lokhu kuzophazamisa neNPA okufanele iphenye loludaba ngaphandle kokuthatha uhlangothi,” kubhalwe esitatimendeni seqembu.
UMasipala wasePolokwane uyaziqhelelanisa nezinsolo ezibhekiswe kuSimelane.
Okhulumela uMasipala uThipa Selala uthi uMasipala wakuhoxisa ukuxhasa iVBS Mutual.
“Ngizoqinisekisa ukuthi uMasipala wayixhasa iVBS kodwa wagcina uhoxile kwisivumelwano ngemuva kokubona ukuthi umthetho weMunicipal Finance Management awulandelwanga,” kubeka uSelala.
“UMasipala wahoxisa imali isivumelwano singakaphasiswa ngisho uMnyango wezeziMali. UMasipala awukaze ulahlekelwe yimali kulesivumelwano.”