Unozinti weKaizer Chiefs uBrandon Petersen uthi uzizwa ethobekile ngokuvotelwa ukuthi angene eqenjini leCarling All-Stars XI, elizobhekana nompetha beCarling Cup i-Orlando Pirates kusasa ngo-3 ntambama eMoses Mabhida Stadium.
“Okokuqala nje ngicela ukuveza ukuthi ngaphoxeka kakhulu siphuma ekuseni kwiCarling Knockout,” kusho yena ecashunwa yi-website yeKaizer Chiefs.
“Wumqhudelwano ebesifuna ukulwa siwunqobe. Kodwa ngibona kuwumqondo omuhle ukuba neCarling All-Stars.
“Lo mdlalo unikeza abadlali abasha, ikakhulukazi abadlala kwiDStv Diski Challenge, ithuba lokuzwa izinga lePremiership.
“Ngiwulindele ngabomvu umdlalo nokudlala nabadlali abasafufusa abanye babo. Abalandeli bakhombise ukuseseka ngokusivotela, sonke sizizwa sithobekile. Siyababonga ngokukholelwa kithi.”