UNgqongqoshe wezeMpilo KwaZulu-Natal uNomagugu Simelane usezwakalise ukukhathazeka ngokunyuka kwezibalo zecovid-19 kulesifundazwe.

Umnyango wezeMpilo eKZN uthi zinyuke ngo- 1,742 izibalo zecovid-19 phakathi koMgqibelo neSonto. Izifunda ezithinteke kakhulu iTheku (80%), Umgungundlovu (7%) neLembe (5%).

“Kungokokuqala ezinyangeni eziningi ukunyuka kwezibalo zisondele ku-2000. Izibalo zakamuva zinyuke kakhulu kwezijwayelekile, zasuka ku-414 kuya ku-1,171.”

USimelane uthe uyakhathazeka ngokunyuka kwezibalo zeziguli ezingeniswa ezibhedlela ngenxa yecovid-19.

“Kubantu abangu-437 abangeniswe ezibhedlela zikahulumeni nezizimele, bangu-47 abasesimeni esibucayi, abangu-9 baphefumula ngemishini. Ngesonto eledlule, isifundazwe sasinesibalo sabantu abangu-342 abangeniswe ezibhedlela ngenxa yecovid-19, abangu-44 babesesimeni esibucayi, abangu-11 bephufumula nge-oxygen.

Ngokohlelo lwethu lokuxwayisa umphakathi, ukunyuka kwezibalo ngo-10% ezinsukwini eziyisikhombisa kuzokhipha isexwayiso. Ukunyuka kwezibalo ngo-20% ezinsukwini eziyisikhombisa kungenzeka kuqale phansi ukusabalala kwecovid-19,” kubeka uSimelane.

USimelane uphikile ukuthi ukunyuka kwezibalo kuchaza ukuqala kwesigaba sesihlanu.

“Kuyacaca ukuthi kukhona okuthile okwenzekalayo. Angeke siqinisekise ukuthi lesi yisigaba sesihlanu noma cha. Ukunyuka kwezibalo kuyathusa kakhulu. Yingakho sinxenxa bonke abantu bakulesi sifuna ukuthi bahlale beqaphile, bajwayele nokulandela imigomo yecovid-19, efana nokugqoka izimfonyo, ukuqhela ngebanga elibekiwe komunye umuntu nokuwasha izandla ngensipho namanzi noma ukusebenzisa isibulalimagciwane.”

Babalelwa ku-16,079 abantu ababulawe yicovid-19 kulesi sifundazwe.

Ngokolwazi loMnyangk wezeMpilo, bangu-2,756 million abantu asebejovile, kanti babalelwa ku-4,463 million abasabalekela ukujikela iCovid-19.

“Siyabacela labo abangagomile ukuthi basondele bezojova. Lokhu kuzosizwa bona, ngoba abantu abangagomile yibona abasengcupheni yokutheleleka ngecovid-19 futhi kulula ukuthi bathelele abanye ngaleligciwane. Benjalo nje basengcupheni yokushona ngenxa yecovid-19 uma ubaqhathanisa nabantu abangagomile,” kusho uSimelane.