Sphamandla Gumede 


Bazoncela izithupha abathandi bebhola lombhoxo bakukeli njengoba sekuqinisekiswe izindaba zokuthi amaSpringboks angeke ekwazi ukusingatha umdlalo kulonyaka. 
Lezi zindaba zivezwe isikhulu seSouth African Rugby uJurie Roux ngoLwesibili. URoux, obechaza esithangamini sabezindaba, uthe amaBoks asalelwe ukukhetha ukuyodlala iRugby Championship ezobanjelwa eNew Zealand kulonyaka. 


ISouth African Rugby isaxoxisana namazwe aseNorth ngenhloso yokuzwana amandla namaqembu esizwe akhona ngasekupheleni konyaka kodwa akukho osekuqinisekisiwe. 
URoux uthe abanalo ithemba mayelana nokuvulwa kwebhoda yakuleli, okuchaza ukuthi alikho iqembu lesizwe elizovunyelwa ukungena kuleli. 

AmaBoks akleliswe endaweni yokuqala emazweni ngokwebhola lombhoxo, okuwumphumela wokunqoba iNdebe yoMhlaba neRugby Championship ngo-2019. Ukungadlali imidlalo eyanele kungabeka indawo yabo encupheni. 

Izinto aziyihambeli kahle iSouth African Rugby njengoba ibhola lombhoxo lisamisiwe kuleli kulandela ukuqubuka kwesifo somkhuhlane iCovid 19. INingizimu Africa ikleliswe endaweni yesihlanu ngesibalo sabantu asebesuleleke ngeCovid 19 emazweni omhlaba. 

Kwenzeka lokhu nje, inhlangano iNew Zealand Rugby ishaye ngesithende iNingizimu Africa, i-Argentina neJapan ibakhipha ezinhlelweni zayo zeSuper Rugby kusukela ngonyaka ozayo.