UMqondisi weKaizer Chiefa uKaizer Motaung Jnr ubona umqeqeshi omusha uNasreddine Nabi ezoyimela ingcindezi yokubuyisa izinsuku zenjabulo eNaturena.
IChiefs igcine ikuvezile ukuthi uNabi usayine inkontileka yeminyaka emibili enombandela wokwelulwa ngomunye unyaka.
UNabi useqalile ukuhlola abadlali njengoba ejoyine ikhempu yeqembu ebanjelwe eTurkey ezinsukwini ezedlule. IGlamour Boys iqinisekise nethimba elizolekelela uNabi, okukhona kulo uKhalil Ben Youssef (oyiphini lokuqala), Fernando Da Cruz (oyiphini lesibili), Ilyes Mzoughi (ocija onozinti) noSafi Majdi.
“Umqeqeshi omusha uqokwe ngemuva kohlelo lokuhlunga oluthathe isikhathi eside. Sikholwa ukuthi sithole umqeqeshi ozokwazi ukufeza iphupho lokubuyisela Amakhosi endaweni ewafanele esicongweni sebhola eNingizimu Afrika.
“Simamukela ngezandla ezimhlophe umqeqeshi uNabi nethimba lakhe. Sizobaxhasa ngakho konke abakudingayo ukuze bezobuyisa isithunzi seqembu,” kubeka uMotaung Jnr.
UNabi (58) ungumakadebona ebholeni, ikakhulukazi e-Africa. Lomqeqeshi usepheke amaqembu amakhulu eLibya, DR Congo, Egypt, Sudan, United Arab Emirates (UAE), Tanzania naseMorocco.