Umqeqeshi weKaizer Chiefs uNasreddine Nabi uthi akumfakelanga uvalo ukuthola isibhaxu kwiSekhukhune United kodwa okubalulekile yindlela ‘abazophendula’ ngayo emdlalweni olandelayo.
ISekhukhune sixebule iChiefs ngo 3-1 ngoLwesibili ebusuku eFNB Stadium. Bekungokokuqala Amakhosi ethola induku kule sizini.
“Ngokubona kwami senze inqwaba yamathuba aholele ekutheni sidedele amagoli. ISekhukhune isidalele inqwaba yezinkinga, ikakhulukazi uma ihlasela sakuzuma nangamabhola amade ebesihluleka ukumelana nawo.
“Asidlalanga kahle namhlaanje. Akhona amathuba esiwakhile kodwa bekunganele, nomdlalo besingawuphethe. Kodwa ke angisiboni isidingo sokutatazela.
“Isizini isaqala, kufanele sifunde nje kokwenzeke namhlanje, sifunde kumaphutha esiwonzile, siye omdlalweni olandelayo siwulungiselele kangcono. Ngizokusho nokuthi iSekhukhune bekuyifanele ukuthola amaphuzu amathathu namhlanje.”
IChiefs izothola isikhashana sokuphumula njengoba ngoMgqibelo izobhekana neqembu lase-Angola iKabucorp.