Ikhempu yeMamelodi Sundowns ezobanjelwa e-Austria izovulela uMothobi Mvala ithuba lesibili lokubhekana nengwazi yaseBrazil uNeymar.
ISundowns izobhekisa amabombo e-Austria kungekudala njengoba izoqala amalungiselelo esizini ka-2024-25.
Kuloluhambo, amaBrazilians azongcweka ne-Al Hilal, okuyiqembu laseSaudi Arabia elinezihlabani okugqame kuzo uNeymar Jnr. Lamaqembu azotholana phezulu ngomhlaka 26 kuJulayi.
Uma uMvala noNeymar bewuqala umdlalo, kuzobe kuyihlandla lesibili begijima enkundleni eyodwa kwazise bahlangana okokuqala ngo-2016 emdlalweni wama-Olympics ayesingathelwe eRio, eBrazil.
Ngalowo nyaka, uMvala wayeyibamba enkabeni yesisu kodwa wayelokhu efukuze njalo emaka uNeymar nozakwakhe kulomdlalo owaphela zibambene ngo 0-0.
“Ngawucijela lowomdlalo. Uma kuqhubeka umdlalo, uyakhohlwa ngamagama abadlali, nawe usuke uzozibonakalisa. Ukubhekana nabadlali abafana noNeymar kuyithuba elihle lokuzihlola izinga kwazise ungumdlali onebhola elinomjiko. Yize sathwala kanzima emdlalweni, sakwazi ukubuya nephuzu,” kusho uMvala ekhumbula lomdlalo owawubanjelwe e-Arena BRB Mané Garrincha.
UMvala wakhishwa ngekhadi elibomvu ngomzuzu ka-59, washiya iNingizimu Afrika isele nomthwalo wokulwa ingaphelele ibhekene nosokhaya ababethwelwe ngeqoma.
U-Aubrey Modiba noRivaldo Coetzee ngabanye abadlali beDowns ababehambe nesikwati sika-Under 23 kuma-Olympics.
Ngonyaka ka-2016, uMvala wayesadlalela iHighlands Park eyayigijima kwiNational First Division.