Isekela likamqeqeshi kwiCape Town Spurs uVasili Manousakis ubona inhlanhla ecashile ngokubhekana ne-Orlando Pirates kwiCarling Knockout.
UManousakis uthi lomdlalo uyithuba lokubona ukubumbana nokuqina kweqembu. Bucs neSpurs bazotholana kwi-last 16 e-Orlando Stadium namuhla ebusuku (19:30).
UManousakis ulekelela uSean Connor obekwe njengomqeqeshi okwesikhashana. Sekuyisonto lesithathu bebambe izintambo kusukela kwaxoshwa uShaun Bartlett.
ISpurs sibhinjelwa imiphumela kwiDSTV njengoba sithole isibhaxu kuyona yonke imidlalo engu-8.
UManousakis ubekhona emdlalweni wokugcina neSuperSport United, nawo owaphela ngenduku ka 2-1. UManousakis ukholwa ukuthi umdlalo wabo neBucs uzokhombisa izindawo abalungisile kuzo.
“Sidlala nelinye lamaqembu amakhulu kwiligi. IPirates ijwayele ukunqoba izindebe. Umqeqeshi wabo usezingeni eliphezulu, nabadlali abakhona bayalazi ibhola.
Kungenzeka siyivukele esiswini iPirates. Abadlali abanakho ukuzethemba, basathukile ngesimo abadlula kuso.
Kunzima ukubuya nomphumela ogculisayo e-Orlando Stadium. Lokho kuzokhombisa ukuqina kweqembu nezinhlelo zokuya phambili,” kuchaza uManousakis ekhuluma esithangamini nabezindaba eParktown.
Lomqeqeshi uthi ukhuthazwa ukubona imimoya iphezulu ejimini, okuyinkomba yokuthi abadlali bawulangazelele lomdlalo.
“Abadlali bakhombisa ukubumbana. Siyaqonda ukuthi umdlalo unzima kodwa kuyadingeka singcweke namaqembu asezingeni eliphezulu ukuze sizobona izindawo esishoda kuzo,” kusho uManousakis.