Umqeqeshi oyibamba kwi-Ivory Coast u-Emerse Fae uthi iqembu lakhe livuke ekufeni kwi-African Cup of Nations (AFCON) njengoba lacishe labhekana nehlazo lokukhishwa esigabeni samaqoqo ekhaya.
I-Ivory Coast yaphunyuka kwesamaqoqo ingelinye lamaqembu aqede esendaweni yesithathu nerekhodi elingcono. Leliqembu lathola isibhaxu libhekene ne-Equatorial Guinea neNigeria.
UFae ubanjiswe izintambo okwesikhashana kulandela ukuxoshwa kowayengumqeqeshi uJean Louis Gasset obebhinjelwa imiphumela.
UFae ujike izinto kwiCote d’ Ivoire njengoba eselifake kuma-semifinals.
“Ngabachazela abadlali ukuthi sifile kulandela ukuhlulwa yi-Equatorial Guinea. Savuka ekufeni ngemuva komdlalo weMorocco neZambia,” kuchaza uFae ecashunwa abeCAF Online.
ICote d’ Ivoire ilandele ngokuhlula abavikeli besicoco iSenegal kwi-last 16, ngaphambi kokushaya iMali kuma-quarterfinals ngoLwesihlanu ebusuku.
UFae uvume eyokukhuphukelwa umoya emdlalweni weMali.
“Bengicabanga izinto eziningi, ngibheka izinguquko ebezidingeka. Ubhekana namaqemnu asezingeni eliphezulu uma sekuyisigaba samasemifinals. Sizozicija ngendlela,” kuchaza uFae.
ICote d’ Ivoire izobhekana neDR Congo kuma-semifinals ngoLwesibili.