Umqeqeshi weBafana Bafana obambe izintambo kwiCOSAFA Cup uHelman Mkhalele ukholwa ukuthi kunabadlali abazibeke ethubeni lokubizelwa esikwatini sikaHugo Broos yize iqembu lihlulekile ukuzibekisela ngendawo kuma-semifinals.
UThabang Sibanyoni ushaye igoli eliweze iBafana ibhekene ne-Eswatini emdlalweni wokugcina wamaqoqo obubanjelwe eNelson Mandela Bay ngoLwesibili.
Lomphumela uphuthisele iBafana ngendawo kuma-semifinals njengoba iqede endaweni yesibili namaphuzu amahlanu kuGroup A.
IMozambique, eqoqe amaphuzu alinganayo neBafana, iqede esicongweni ngomthetho wokushaya amagoli amaningi. IMozambique ihlule iBotswana ngo 3-1.
Umthetho weCOSAFA ukubeka kucace ukuthi amaqembu akleliswe esicongweni emaqoqweni amathathu yiwona adlulela kuma-semifinals. Iqembu lokugcina elidlulela kuma-semifinals kuba yileli eliqede endaweni yesibili linamaphuzu amaningi uma kuqhathaniswa namanye amaqembu.
UMkhalele uthe uyaziqhenya ngabadlali yize bengakwazanga ukudlulela emzuliswaneni olandelayo.
“Ngiyaziqhenya ngabadlali, badlale ngokuzikhandla, bazinikela ngakho konke. Ngiyaziqhenya kakhulu ngabo,” kubeka uMkhalele ecashunwa iSAFA Media.
UMkhalele uthi abadlali babuye nesipiliyoni sokudlala eqenjini lesizwe.
“Ngijabule ngalokho engikubonile kubadlali. Bazibonakalisile kulemidlalo emithathu. Ngibona sebesondele kakhulu esikwatini esidlala emidlalweni yokuhlungela iNdebe yoMhlaba nemidlalo yokuhlungela i-Africa Cup of Nations (esicijwa uHugo Broos).
“Abadlali bakhombisile ukuthi sebekulungele ukudlala esikwatini. Lomqhudelwano uzosiza kakhulu ngoba abadlali abazobizelwa esikwatini bazotonyulwa kuleliqembu elidlale kwiCOSAFA,” kubeka uMkhalele.