Umqeqeshi weCape Town Spurs u-Ernst Middendorp uthi iqembu liqukethe idlanzana labadlali elingakulungele ukugijima esigabeni seDSTV Premiership.
UMiddendorp ubeke lenkulumo sekuphele umdlalo weligi beshaywa iMamelodi Sundowns ngo 3-0.
Bekuyihlandla lika-11 i-Urban Warriors ithola induku kwiDSTV Premiership kulesizini. UMiddendorp ubehlulwa okwesithathu selokhu eqashiwe eKapa.
ISpurs sisanqobe umdlalo owodwa kwiligi, okuwumphela owashaqisa abaningi behlula i-Orlando Pirates ngo 2-1 eDHL Stadium ngoNovemba.
UMiddendorp uthi abadlali abancane basadinga ukukhonjiswa indlela. Lomqeqeshi ubeke nokuthi isikwati seqembu asigcwele abadlali abadala.
“U-Asanele (Velebayi), Chumani (Butsaka) noMorne Nel basebancane. Kukhona abadlali abane abadala ngokweminyaka. Iqiniso ukuthi kusadingeka isipiliyoni.
UMaboe (Lebohang), Thapelo Morena noRushine De Reuck ngabakhuphulela eqenjini elikhulu ngisaqeqesha kwiMaritzburg United neBloemfontein Celtic ngaphambilini.
Singakwazi ukudlala nePirates namanye amaqembu kodwa inkinga yethu isipiliyoni. Kubalulekile ukuthi abadlali bazimisele, bazikhandle. Ngibone sishode ngamandla okulwa, inkinga esinayo eyokuzikhandla.
Banishing abasezingeni eliphezulu eqenjini. Sinenkinga yokungaqini uma kubangwa ibhola, ikakhulukazi esiswini. Besihluleka ukuvimba uZungu (Bongani), Mbule (Sipho) noMaboe. Kudingeka abadlali abazokwazi ukumelana namandla.
Akudingeki sidlale ingcwenga yebhola, kufuneka silwele ukuvimba abadlali, ukuze sizonqanda ubungozi. Abadlali abaningi abekho ezingeni lokudlala kwiPSL okwamanje, lokho kuyiqiniso,” kuchaza uMiddendorp.