Umqeqeshi weMamelodi Sundowns uRulani Mokwena uthi kuyabaphoqa ukubuya namaphuzu amathathu emdlalweni weCAF Champions League abazowudlala nePyramids ngoba amaqembu akuGroup A asondelene eduze ngokwamaphuzu.
Kushube umnkantsha kuleliqoqo njengoba iSundowns, TP Mazembe, Nouadibhou nePyramids belingana ngamaphuzu amane ngemuva kwemizuliswano emithathu.
IDowns nePyramids bacazelana amaphuzu emlenzeni wokuqala eLoftus Versfeld. Umdlalo waphela ngo 0-0, lingekho iqembu elithole oqekelele phambi kwamapali.
“Kubalulekile ukuthola umphumela ogculisayo ngoba sekusele imidlalo emithathu kuleliqoqo. Ngiyathemba ukuthi sinesipiliyoni sokunqoba lomdlalo.
Kusele imidlalo emibili yasekuhambeni. Kusafanele sihambele eMauritania, komunye umdlalo onzima ngoba siyodlala enkundleni enotshani bokufakelwa. Isimo sezulu sizoba yinkinga eMauritania.
Ngithemba ukuthi sizoqeda imidlalo yasekuhambeni sesinomsebenzi olula emdlalweni weTP Mazembe ngoba sizimisele ngokuqeda esicongweni. Sizolungiselela umdlalo ngamunye ngoba kunemidlalo enzima elandelayo,” kuchaza uRulani ekhuluma nabezindaba.
URulani uthi useyihlaziyile iPyramids, usebabonile nabadlali abayingozi.
“IPyramids ibukeka iyiqembu elihle. Ngihlaziye umdlalo wayo wangoLwesine ophele ngo 2-2. Bekufanele bewunqobe umdlalo. Ngibone nokuthi isebenzise abadlali abane abangaqalanga ngesikhathi sidlala nabo.
Ukapteni u-Al Said udlale ingcwenga yebhola, noFathi udlale kahle. UMayele ubengumgadli, uGabr udlalile yize kungenzeka ashintshe u-Osama. Bayiqembu eliqinile, kukhona u-El Karti osebenzisa amandla. UMohamed Lasheen uyinkinga esiswini.
Ngilindele ukuthi basifakele ingcindezi, kukhona uFagrie ozophithizela phambili. Abadlali basemuva ezimpondweni uHamdy noChibi banebhola elihle. Kusekhona noRamadan Sobhi okungenzeka awuqale umdlalo.
Sibahlaziyile bebhekene neTP Mazembe ekhaya. Badlala ibhola elihlukile uma kuqhathaniswa nomdlalo wethu. IPyramids ishintsha uhlelo lokudlala uma isekuhambeni.
Siyicijele iPyramids, siyihlaziyile, sesifuna ukuyigojela esibayeni sayo,” kuchaza uRulani.
Umdlalo uzoqala ngehora lesithupha eNew Cairo namuhla.