Umshayimagoli ohambe phambili kwiGladAfrica Championship kulesizini ephelile uTiklas Thutlwa uthi usekulungele ukudlala esigabeni seDSTV Premiership.
UThutlwa ushaye amagoli angu-16 kwiGladAfrica esindisa iqembu lakhe iBlack Leopards ezembeni. Ukuqhulula kwakhe amagoli kumnqobise umklomelo emcimbini obuhlelwe iPremier Soccer League (PSL).
UThutlwa (23) ukwazi ukudlala ezimpondweni zombili, ayibambe endaweni yokuhlasela ngaphambi kwenkaba yesisu aphinde afolose phambili.
Yize eshaye ingcwenga yebhola ekubeni iLidoda Duvha ibibhacaza, uThutlwa uncome iqembu ngokumsiza abe sefomini.
“Ngibe nesizini enhle. Ngizamile ukushaya amagoli ukuze ngizoqeda nginamagoli amaningi. Ngisebenze ngokuzikhandla, ngasizwa ozakwethu. Ngibonga nabaqeqeshi ngokunginikeza ithuba.
Konke kuqale ejimini. Besisebenza kanzima silungisa ubukhali bami phambi kwamapali. Besijima isizini yonke,” kusho uThutlwa ekhuluma nabezindaba.
Ngemuva kokuhluleka ukushaya amagoli kwiDSTV Premiership ngesizini ka-2020/21, uThutlwa ubevutha engabaselwe kulesizini, okuyinkomba yokuthi usekulungele ukudlala esigabeni esiphezulu.
Yize kunzima ukuqhuba ifomu yamagoli kwiDSTV Premiership uma umdlali esuka kwiNFD, bakhona abadlali abakwaziyo ukumelana nengcindezi yokushaya amagoli esigabeni esiphezulu. UPeter Shalulile, Mwape Musonda noThabiso Kutumela baqhubekile nokushaya amagoli kwiDSTV Premiership njengoba bebevutha nakuNFD.
“Anginalo ulwazi oluningi kodwa kukhona iqembu elingifunayo. Bayangifuna impela inkinga anginalo ulwazi olugcwele. Ngizimisele ngokudlala kwiDSTV Premiership. Uma ngingadedelwanga njengoba sekuzovulwa iwindi, ngizolwela ukubuyisela iqembu kwiPSL,” kusho uThutlwa.